БИЗНЕСИЙН НИЙГМИЙН ХАРИУЦЛАГА ЯАГААД ХЭРЭГТЭЙ ВЭ?

Бизнесүүд зөвхөн ашгийн төлөө бус, нийгмийн хариуцлагаа ухамсарлан ажиллах нь улам бүр чухал болж байна. Монголын хувьд нийгмийн хариуцлагын хүрээнд бодит үр дүнтэй томоохон төслүүдийг санаачилж хэрэгжүүлсэн компаниуд одоогоор цөөн байгаа нь анзаарагдаж байна. Тиймээс томоохон компаниуд жишиг болж, бусдыгаа манлайлж ажиллах шаардлага өндөр байна.

Компанийн нийгмийн хариуцлага (CSR) байх ёстой үндсэн шалтгаанууд:

• Тогтвортой хөгжил: Байгаль орчин, нийгмийн асуудалд анхаарал хандуулснаар тогтвортой хөгжлийг дэмждэг.
• Нийгмийн эерэг өөрчлөлтөд хувь нэмэр оруулах: Нийгмийн эмзэг бүлэг, боловсрол, эрүүл мэнд зэрэг асуудалд туслах боломжийг бий болгодог.
• Бизнесийн нэр хүндийг өсгөх: Харилцагч, хэрэглэгч, хөрөнгө оруулагчдын дунд эерэг имижийг бүрдүүлдэг.
• Ажилчдын урам зориг, сэтгэл ханамж: Ажилчдын бахархал, сэтгэл ханамжийг нэмэгдүүлж, тогтвортой ажиллах нөхцөл бүрдүүлдэг.
• Эрсдэл бууруулах: Байгаль орчин, хууль эрхзүйн эрсдэлээс урьдчилан сэргийлэхэд тусалдаг.

Дэлхий дахинд бизнесийн нийгмийн хариуцлагын (CSR) жишиг болж буй зарим амжилттай кейсийг танилцуулъя.

1. Patagonia - Байгаль орчныг хамгаалагч брэнд

Патагониа брэнд нь бүтээгдэхүүнийхээ борлуулалтын тодорхой хэсгийг байгаль орчин хамгаалах төсөлд хандивладаг. Тэд байгальд ээлтэй үйлдвэрлэл явуулж, хэрэглэгчдэд бүтээгдэхүүнээ засан ашиглах боломж олгож, тогтвортой хэрэглээг дэмждэг.

2. Unilever - Тогтвортой хөгжлийн төлөө амлалт

Юнилевер компани нь "Тогтвортой амьдралын төлөвлөгөө" (Sustainable Living Plan)-г хэрэгжүүлдэг бөгөөд хүрээлэн буй орчин, нийгмийн сайн сайхан байдлыг дэмжих чиглэлд олон санаачлага гаргаж, бизнесийн үйл ажиллагаандаа нэгтгэсэн нь олон компанид жишиг болж байна.

3. TOMS - "Нэгийг авбал нэгийг өгнө" бизнес загвар

TOMS компани нь нэг бүтээгдэхүүн борлуулах бүрдээ нэг хэрэгцээт хүнд бүтээгдэхүүнээ хандивлах зарчимтай. Энэ санаачлага нь олон улсын хэмжээнд алдартай болж, нийгмийн асуудлыг шийдэх үр дүнтэй арга хэлбэрийн нэг болжээ.

4. LEGO - Хүүхдийн боловсролыг дэмжигч

LEGO групп нь хүүхдийн боловсролыг хөгжүүлэх төсөлд хөрөнгө оруулалт хийдэг бөгөөд дэлхий даяар олон сая хүүхдэд тоглоомоор дамжуулан боловсрол олгох төслүүдийг хэрэгжүүлж байна.

5. Starbucks - Хариуцлагатай нийлүүлэлтийн гинжин хэлхээ

Старбакс компани нь кофе нийлүүлэгч жижиг аж ахуйн нэгжүүдийг дэмжиж, тэдний тогтвортой хөгжлийг хангах, фермерүүдийн амьжиргааг сайжруулахад хувь нэмэр оруулдаг.

Эдгээр кейсүүд нь бизнесийн байгууллагуудад нийгмийн хариуцлагыг үр дүнтэй хэрэгжүүлэх, тогтвортой хөгжлийн зорилтуудыг дэмжих гайхалтай жишээ болж байна.